މި މަހުގެ 30 ގައި ބާއްވާ ރިޔާސީ އިންތިހާބުގެ ދެ ވަނަ ބުރުގައި ރަށްވެހިވެފައިވާ ތަން ނޫން އެހެން ތަނަކަށް ވޯޓު ލާން ރީ-ރަޖިސްޓްރީ ކުރަން މިހާތަނަށް 25،000 އަށް ވުރެ ގިނަ ފޯމު ލިބިފައިވާ ކަމަށް އިލެކްޝަންސް ކޮމިޝަން (އީސީ) އިން މިއަދު ބުނެފި އެވެ.
އީސީގެ ނައިބު ރައީސް އިސްމާއިލް ހަބީބް ވިދާޅުވީ، ދެ ވަނަ ބުރުގެ ރީ-ރަޖިސްޓްރޭޝަނަށް މިދިޔަ ހުކުރު ދުވަހު ހުޅުވައިލުމުން އެ ދުވަހު އެކަނިވެސް 9،206 ފޯމު ލިބުނު ކަމަށެވެ. އަދި އިއްޔެ 18،349 މީހުން ރީ-ރަޖިސްޓްރީ ވާން ހުށަހެޅި ކަމަށް ވިދާޅުވިއެވެ. އެގޮތުން ދެ ދުވަހުގެ ތެރޭގައި ޖުމްލަ 25،493 މީހުން ރީ-ރަޖިސްޓްރީ ވާން ހުށަހެޅިއިރު، އޭގެ ތެރޭގައި ގިނައީ އޮންލައިންކޮށް ހުށަހެޅި ފޯމުތަކެވެ.
ހަބީބް ވިދާޅުވީ، މިހާތަނަށް ހުށަހެޅި ފޯމު ތަކުގެ ތެރެއިން، 10،271 މީހުން ރީ-ރަޖިސްޓްރީ ކޮށްދީފައިވާ ކަމަށާއި އެކިއެކި ސަބަބުތަކާ ހުރެ، 1،546 ފޯމު ރިޖެކްޓް ކުރި ކަމަށެވެ.
ރީ-ރަޖިސްޓްރީ ކުރުމުގެ އެންމެ ފަހު ގަޑިއަކީ މިއަދު ހަވީރު 4:00 ގެ ކުރިންނެވެ.
މި މަހުގެ ނުވަ ވަނަ ދުވަހު ބޭއްވި އިންތިހާބުގެ ފުރަތަމަ ބުރުގައި 50،000 އަށް ވުރެ ގިނަ މީހުން ވޯޓު ލާފައެއް ނުވެއެވެ.