މި މަހުގެ 30 ވަނަ ދުވަހު ބާއްވާ ރިޔާސީ އިންތިހާބުގެ ދެވަނަ ބުރުގައި މޯލްޑިވްސް ނޭޝަނަލް ޕާޓީ (އެމްއެންޕީ) އިން ތާއީދުކުރާނެ ކެންޑިޑޭޓެއް މިރޭ ނިންމާނެކަން "ލޯމާ" އަށް އެނގިއްޖެއެވެ.
މިދިޔަ ހޮނިހިރު ދުވަހު ބޭއްވި ރިޔާސީ އިންތިހާބުގެ ފުރަތަމަ ބުރުގައި އެންމެ ގިނަ ވޯޓު ހޯއްދެވީ، ޕީއެންސީގެ ރިޔާސީ ކެންޑިޑޭޓް ޑރ. މުއިއްޒެވެ. ދެވަނަ އަށް އެންމެ ގިނަ ވޯޓު އެމްޑީޕީގެ ރިޔާސީ ކެންޑިޑޭޓް، ރައީސް އިބްރާހިމް މުހައްމަދު ސޯލިހު ހޯއްދެވިއިރު ތިން ވަނަ ލިބުނީ ކުރީގެ ރައީސް މުހައްމަދު ނަޝީދު އިސްވެ ހުންނަވައި އުފެއްދެވި "ދަ ޑިމޮކްރެޓްސް"ގެ ކެންޑިޑޭޓް އިލްޔާސް ލަބީބަށެވެ.
އެމްއެންޕީގެ ފަރާތުން ވާދަކުރެއްވި އެ ޕާޓީގެ ރައީސް މުހައްމަދު ނާޒިމް (ކާނަލް ނާޒިމް) އަށް ލިބިވަޑައިގެންނެވީ ފަހަތުން ދެވަނަ އެވެ. އެއީ، 1،907 ވޯޓެވެ.
ލޯމާ އަށް އެނގިފައިވާ ގޮތުގައި އެމްއެންޕީން މިރޭ އެ ޕާޓީގެ ކައުންސިލް ބައްދަލުވުމެއް ބާއްވާނެއެވެ. އެ ބައްދަލުވުމުގައި ދެވަނަ ބުރެއްގައި ތާއީދުކުރާނެ ކެންޑިޑޭޓެއް ނިންމާ ގޮތަށް ހަމަޖައްސާފައިވާކަންވެސް އެނގިފައިވެއެވެ.
އެނގިފައިވާ ގޮތުގައި އެ ބައްދަލުވުމުގައި ޑރ. މުއިއްޒާއި ރައީސް ސޯލިހުގެ ހުށަހެޅުންތަކާ ގުޅޭ ގޮތުން މަޝްވަރާކޮށް ޕާޓީއަށް އެންމެ ރަނގަޅު ގޮތެއް ނިންމާނެއެވެ. އެމްއެންޕީގެ ކައުންސިލްގައި އެ ޕާޓީގެ ރައީސް އާއި ނައިބު ރައީސުންނާއި އަންހެނުންގެ ވިންގާއު ޔޫތު ވިންގުގެ ރައީސާއި ބައެއް ކައުންސިލް މެންބަރުން ހިމެނެއެވެ. އެ ކައުންސިލްގެ މެޖޯރިޓީގެ ތާއީދު އޮތީ މުއިއްޒަށްކަން އިތުބާރު ހިފޭ މަސްދަރަކުން ވަނީ "ލޯމާ" އަށް ކަށަވަރުކޮށްދީފައެވެ. ނަމަވެސް މިކަމާ ގުޅިގެން އެމްއެންޕީން ރަސްމީ އެއްވެސް އެއްޗެއް އަދި ބުނެފައެއް ނުވެއެވެ.
އެމްއެންޕީގައި 10،000 ވުރެ ގިނަ މެންބަރުން އެބަތިއްބެވެ.