ޓޫރިޒަމް މިނިސްޓަރު ޑރ. އަބްދުﷲ މައުސޫމް އެމްޑީޕީއަށް ސޮއިކޮށްފިއެވެ.
ޑރ. މައުސޫމް ޓޫރިޒަމް މިނިސްޓަރުކަމަށް އައީ ޖޭޕީގެ ސްލޮޓެއްގައެވެ. ނަމަވެސް މި މަހުގެ ހަތް ވަނަ ދުވަހު އޭނާ ވަނީ ދިހަ އަހަރަށް ފަހު އެ ޕާޓީން ވަކިވެފައެވެ.
އެމްޑީޕީގެ ރަސްމީ ޓްވިޓާ އެކައުންޓުން ކުރި ޓްވީޓެއްގައި ވަނީ މައުސޫމް އެމްޑީޕީއަށް ސޮއިކުރެއްވުމަށް ފަހު އޭނާގެ މެމްބާޝިޕް ފޯމު ރައީސް އިބްރާހިމް މުހައްމަދު ސޯލިހުގެ އަތްޕުޅަށް އަރުވާ ފޮޓޯތަކެއް ހިއްސާކޮށްފަ އެވެ.
އަންނަ މަހުގެ ހަތް ވަނަ ދުވަހު ބާއްވާ ރިޔާސީ އިންތިހާބުގައި ވާދަކުރައްވަން ރައީސް ސޯލިހަށް ޓިކެޓު ލިބުމާ އެކު ޑރ. މައުސޫމް ތާއީދު އޮތްކަން ހާމަކުރެއްވި އެވެ. ނަމަވެސް އެއިރު އެ ޕާޓީ ދޫކޮށް ނުދިޔައީ ރައީސަށް އެ ޕާޓީން ތާއީދުކުރާނެ ކަމުގެ އުންމީދުގައި ކަމަށް އޭނާ ވަނީ ވިދާޅުވެފައެވެ.