ރައްޔިތުންގެ މަޖިލިސް ކުރިމަތީ ހުންނަ ޕާކިން ޒޯނުގައި ބަހައްޓާފައި ހުރި ސައިކަލުތަކެއްގައި ރޭ ދަންވަރުގެ ވަގުތެއްގައި ރޯކޮށްލައިފިއެވެ.
މި ހާދިސާގައި ތިން ސައިކަލު އެއްކޮށް ބޭނުންނުކުރެވޭ ވަރަށް އަނދާ ހުލިވެފައިވާއިރު، އެ ސައިކަލުތައް ކައިރީގައި ޕާކުކޮށްފައި އޮތް ވޭނެއް ވެސް އަދި އިތުރު ހަތަރު ސައިކަލަށް ވެސް ވަނީ އަލިފާނުގެ އަސަރުކޮށްފައެވެ.
ފުލުހުން މީޑިއާތަކަށް މިއަދު ފޮނުވި މެސެޖެއްގައި ބުނީ، ސައިކަލުތަކެއްގައި ރޯކޮށްލި ކަމަށް ރޭ ދަންވަރު 3:03 އެހާކަންހާއިރު ފުލުހުންނަށް ރިޕޯޓުކޮށްފައިވާ ކަމަށެވެ.
މަންޒަރު ދުށް މީހާ ކިޔައިދިން ގޮތުގައި ސައިކަލުތަކުގައި ރޯވުމާ އެކު ގިނަ އަދަދެއްގެ ފުލުހުން ވަނީ އެ ސަރަހައްދުގައި ހަރަކާތްތެރިވެފައެވެ. އަދި، އަލިފާންގަނޑު ނިއްވާލުމުން ފުލުހުން ވަނީ އެ ސަރަހައްދުގައި ޓޭޕު ދަމާ ބަންދުކޮށްފައެވެ.
މި މައްސަލައިގެ ތުހުމަތުގައި މިހާތަނަށް މީހަކު ހައްޔަރުކޮށްފައިނުވި ނަމަވެސް ރޯކޮށްލި ކަމަށް ތުހުމަތުކުރެވޭ މީހާ ދެނެގަނެވިފައިވާ ކަމަށް ފުލުހުން ބުންޏެވެ. އަދި އޭނާ ހައްޔަރުކުރުމުގެ މަސައްކަތް ކުރަމުން އަންނަ ކަމަށް ފުލުހުން ބުންޏެވެ.