ނ. މާފަރު ފަޅުތެރެއިން ކަންނެލި ހިފައި، ހުރިހާ ގެއަކަށް މިރޭ ކަންނެލިތައް ބަހައިފިއެވެ.
އެ ރަށުން "ލޯމާ" އަށް މައުލޫމާތު ދިން މީހަކު ބުނި ގޮތުގައި މާފަރު ފަޅުތެރެޔަށް ކަންނެލި އައިނެއް ވަނީ މިއަދު ހަވީރުގެ ވަގުތެއްގައި ކަމަށެވެ. އަދި އެ ކަންނެލި އައިނު ފަޅުތެރެޔަށް ވަނުމުން، ދާ އަޅައިގެން އެ ރަށުގެ ރައްޔިތުން ކަންނެލި ހިފާފައިވާ ކަމަށް އޭނާ ބުންޏެވެ.
އޭނާ ބުނި ގޮތުގައި ގާތްގަނޑަކަށް 300-350 އެއްހާ ކަންނެލި އެ ރަށުގެ ފަޅު ތެރެއިން ހިފިއެވެ.
"ކޮންމެ ގެއަކަށް ކަންނެއްޔަކާއި ފަޅިއެއް ވަނީ ބަހައިފައި. ބިދޭސީން އުޅޭ ގޭގެއަށްވެސް ބެހި" އޭނާ ބުންޏެވެ.
މާފަރަކީ ބޮޑު ފަޅެއް އޮންނަ ރަށެކެވެ. މީގެ ކުރިން 1990 އަހަރުތަކުގައިވެސް އެ ރަށު ފަޅު ތެރެޔަށް ކަންނެލި އައިނެއް ވަދެފައިވާ ކަމަށް އެ ރަށުން މައުލޫމާތު ލިބިފައިވެއެވެ.