އަންހެނުންނާއި ކުޑަކުދިންނަށް ކުރިމަތިވާ ގެވެށި އަނިޔާއާއި ޖިންސީ އަނިޔާ އަދި ފުރައްސާރަކުރުމުގެ މައްސަލަތަކާއި ކުޑަކުދިންގެ ޙަޟާނަތުގެ މައްސަލަތަކާއި މި ބާވަތުގެ އެހެނިހެން މައްސަލަތަކުގައި، މާލީ ތަނަވަސްކަން ނެތް އަންހެނުންނަށް ބޭނުންވާ ގާނޫނީ އެހީތެރިކަން ހިލޭ ފޯރުކޮށްދިނުމާ ގުޅޭ އެއްބަސްވުމެއްގައި ސޮއިކޮށްފިއެވެ.
އެސްއެމްއީ ހަބުގައި ބޭއްވި ބައްދަލުވުމެއްގައި އެ އެއްބަސްވުމުގައި ސޮއިކޮށްފައި ވަނީ ޒުލޭހާ އެންޑް އެސޯސިއޭޓްސް އެލްއެލްޕީއާ ބްރިޖިން ދަ ކޮމިއުނިޓީސް މޯލްޑިވްސްއާ ދެމެދުގައެވެ.
ޒުލޭހާ އެންޑް އެސޯސިއޭޓްސް އެލްއެލްޕީގެ ފަރާތުން މި އެއްބަސްވުމުގައި ސޮއިކުރެއްވީ މެނޭޖިން ޕާޓްނަރު އަލްއުސްތާޒާ ޒުލޭހާ އިބްރާހީމްއެވެ. ބްރިޖިން ދަ ކޮމިއުނިޓީސް މޯލްޑިވްސްގެ ފަރާތުން ސޮއިކުރެއްވީ އެގްޒެކިއުޓިވް ޑިރެކްޓަރު އިބްރާހީމް މުހައްމަދުއެވެ.
އެ އެއްބަސްވުމުގެ މަގުސަދަކީ ގެވެށި އަނިޔާއާއި ޖިންސީ އަނިޔާ އަދި ފުރައްސާރަކުރުމުގެ މައްސަލަތަކާއި ކުޑަކުދިންގެ ހަޟާނަތުގެ މައްސަލަތަކާއި، މި ބާވަތުގެ އެހެނިހެން މައްސަލަތައް މުޖުތަމައުގައި އިތުރުވަމުންދާއިރު، މާލީ ތަނަސްކަން ނެތުމުގެ ސަބަބުން އަނިޔާ ލިބޭ ފަރާތްތަކުގެ ހައްގުތައް ކަށަވަރުކުރުމުގައްޔާއި އަދުލު އިންސާފު ހޯދުމުގައި ހުރަސްތައް ހުރުމުން އެ ކަންކަމުގައި އެހީތެރިކަން ފޯރުކޮށްދިނުމެވެ.
އެ އެއްބަސްވުމުގެ ދަށުން މި ބާވަތުގެ މައްސަލަތަކުގައި ތަހުގީގު އަދި ކޯޓު މަރުހަލާގައި ބޭނުންވާ ގާނޫނީ އެހީތެރިކަން ފޯރުކޮށްދޭނެވެ.