ރާއްޖޭގެ އެންމެ ބޮޑު ފުޓްސަލް މުބާރާތް، ގޯލްޑަން ފުޓްސަލް ޗެލެންޖް 2025ގެ އަތޮޅު ބުރުގައި، ތ. ހިރިލަންދޫއިން އެ އަތޮޅު ގާދިއްފުށި ބޮޑު ތަފާތަކުން ބަލިކޮށްފިއެވެ.

ތ. އަތޮޅުގެ ގްރޫޕް ބީގައި ރޭ ހިރިލަންދޫއާއި ގާދިއްފުށި ބައްދަލުކުރި މެޗުން ހިރިލަންދޫ މޮޅުވީ 6-0 ގެ ނަތީޖާއަކުންނެވެ. އެ މެޗުގެ މޮޅު ކުޅުންތެރިޔާކަން ހޯދި ހިރިލަންދޫގެ މުހައްމަދު ނިޝާހް ވަނީ ތިން ގޯލު ޖަހައިފައެވެ. އެ ޓީމުގެ ބާކީ ގޯލުތައް ޖަހައިފައިވަނީ އަބްދުﷲ އިޝާން އާއި މުހައްމަދު ޝަމްހާންއެވެ.

ތ. އަތޮޅު ގްރޫޕް ބީގައި ހިރިލަންދޫއިން ފުރަތަމަ ކުޅުނު މެޗުންވެސް ވަނީ މޮޅުވެފައެވެ. އެއާއެކު އެ ގްރޫޕްގެ އެއް ވަނައިގައި ޖުމްލަ ހަ ޕޮއިންޓާއެކު އޮތީ ހިރިލަންދޫއެވެ. ބުރުންޏަށްވެސް ހަ ޕޮއިންޓު ލިބިފައިވާއިރު، ގްރޫޕްގެ އެއްވަނަ ހިރިލަންދޫއަށް ލިބެނީ ފައިދާ ގޯލުންނެވެ.

މި މުބާރާތުގައި ހިރިލަންދޫ ދެން ބައްދަލުކުރާނީ ބުރުންޏާއެވެ. އެ މެޗު އޮންނާނީ އަންނަ އަންގާރަ ދުވަހުގެ 23:00 ގައެވެ.