އެއީ މީގެ 20 އަހަރު ކުރިއެވެ. 17 މާރިޗު 2004 ވީ ބުދަ ދުވަހުގެ އިރާކޮޅެވެ ގދ. ތިނަދޫ އެނަމާ ބޯޓު ދަތުރު ކުރަމުންދިޔައީ 122 މީހުންނާއެކު ގއ. ވިލިނގިލިން ފުރައިގެން ތިނަދޫއަށެވެ. އެއީ ވިލިނގިލީގައި އޮތް ފުޅުބޯޅަ މެޗެއް ބެލުމަށް ފަހު އެނބުރި ތިނަދޫއަށް ދިިއުމަށް ކުރި ދަތުރެކެވެ. ސަޕޯޓަރުންނާއެކު އެނަމާ ބޯޓު ވިލިނގިލިން ފުރީ އެރޭ 7:00 ޖަހާކަންހާއިރުއެވެ. ދަތުރަށް ފެށިތާ ގަޑިއިރެއް ނުވަނީސް އެ ބޯޓުގެ އިންޖީނު ހުއްޓި ވަގުތުކޮޅަކަށް ދަތުރު މެދުކެނޑުނެވެ. ނަމަވެސް އިންޖީނަށް ދިމާވި މައްސަލަ ހައްލުކޮށް އަނެއްކާވެސް ދަތުރުފެށިއެވެ.

ދަތުރަށް ގަޑިއިރަކަށްވުރެ ގިނައިރުވީ ފަހުން، އެ ރޭގެ 8:30 ހާއިރު، އެނަމާ ބޯޓާ 40 ފޫޓު ދުރުން ދަތުރު ކުރަމުންދިޔަ "އަރުތަ" ނަމަކަށް ކިޔާ ތިނަދޫ މަސް ދޯންޏެއްގެ މޯހިރުން އުފެދުނު ރާޅެއްގައި ޖެހި އެނަމާ ބޯޓު ބަންޑުން ޖަހާލިއެވެ. 

އެނަމާ ބޯޓު ބަންޑުން ޖަހާލައި އެ ދޯނީގައި ތިބި މީހުން ކަނޑުވިއެވެ. އެ މީހުންނަށް އުންމީދެއް ލިބުނީ، ކަނޑުގައި އިރުގަނޑެއްވި ފަހުން، އެ ސަރަހައްދުން  ދޯންޏެއް ފެނުމުންނެވެ. އެއީ ކޫއްޑޫއަށް ކިރުމަށް 12 ޓަނު މަސް ހިފައިގެން ދިޔަ ގއ. ދާންދޫއަށް ނިސްބަތްވާ ދޯންޏެއް ކަމަށްވާ "މިޔަރެން" ދޯނިއެވެ. ނަމަވެސް އެ ދޯނީގެ ފަރާތުން ކަނޑުވެ ގޮތްހުސްވެފައި ތިބި މީހުންނަށް އެއްވެސް އެހީތެރިކަމެއް ނުލިބުނެވެ. 

އެނަމާ ބޯޓަށް އެންމެ ފުރަތަމަ އެހީތެރިކަން ފޯރުކޮށްދީފައިވަނީ  ތިނަދޫ "އަރުތަ" ދޯނިންނެވެ. ނަމަވެސް އެއިރު ވަނީ ވަގުތު ފާއިތުވެފައެވެ. 24 މީހަކު ވަނީ ގެނބިގެން މަރުވެފައެވެ. އޭގެ ތެރޭގައި ކުޑަކުދިންނާއި އަންހެނުން އަދި އުމުރުން ދުވަސްވީ މީހުން ވެސް ހިމެނެއެވެ. އެ ހާދިސާގައި ވީނުވީއެއް ނޭނގި ފިރިހެނަކާއި ކުޑަކުއްޖެއްވެސް ގެއްލުނެވެ. 

އެ ރޭ އެނަމާ ބޯޓު ދަތުރު ކުރަމުން ދިޔައިރު އޭގައި 88 ފުޅި ކައްކާ ގޭސް ހުސްކުރި ސިލިންޑަރާއި ހޮސްޕިޓަލުގެ މެޑްއޮކްސިޖަން ހުސްކުރި 10 ފުޅި ނޫން އެއްވެސް މުދަލެއް ބަރުކޮށްފައި ނެތެވެ. މިހާ މަދު މުދަލާއެކު އެހާގިނަ މީހުން ބޯޓުގެ މަތީގައި ތިބުމަކީ ބޯޓު ބަންޑުންޖަހާލުމުގެ ސަބަބެއްކަމަށް ކަމާބެހޭ ބައެއް މާހިރުން ވަނީ ބުނެފައެވެ. ބޯޓު ދަތުރުކުރަމުން ދަނިކޮށް ބޯޓުގެ މަތީބަޔަށް މީހުންތައް އެރުން އެއީ އޭގެ ބެލެންސް ގެއްލުނު އެއްސަބަބުކަމަށް އެ ފަރާތްތަކުން ބުނެއެވެ. 

އެނަމާ ކާރިސާއަކީ، ފަހުގެ ތާރީހެއްގައި ރާއްޖޭގައި ހިނގާދިޔަ ކަނޑުމަތީގެ އެންމެ ހިތާމަވެރި ހާދިސާއެވެ. އެ ހާދިސާއިން ގިނަ ބަޔަކަށް އަދިވެސް އަރައިނުގަނެވެއެވެ. އެ ހިތްދަތި ކަޅު ރޭ އިއްޔެވީ ކަމެއްހެން ބައެއް މީހުންގެ ހަނދާނުގައި އެބަހުއްޓެވެ. އެނަމާ ބޯޓު ހާދިސާގައި ދުނިޔެ ދޫކޮށްފައިވާ އެންމެހާ ފަރާތްތަކަށް ސުވަރުގެ މިންވަރު ކުރައްވާށި! އަދި އެ މީހުންގެ އާއިލާތަކަށް ކެތްތެރިކަން ދެއްވާށި! އާމީން