އުފަން ރަށް ގއ. ކަނޑުހުޅުދޫ ދޫކޮށް، ވަރަށް ކުޑައިރު މާލެއަށް ބަދަލުވީއްސުރެ އައިޝަތު ޖީނާ ދިރިއުޅެމުން އައީ ވަރަށް ދަތި ހާލުގެވެ. ކުލީ ކޮޓަރިއެއްގައި ލިބޭ އެއްޗަކުން ކިރިޔާ ފުއްދާލައިގެންނެވެ. އެ ދިރިއުޅުމުގައި ކައިވެންޏެއް ކޮށްގެން ޖީނާއަށް ކުރިމަތިލާން ޖެހުނީ، އަދި މާ ބޮޑު ހިތްދަތިކަމަކާއެވެ. ފިރިމީހާގެ އުފަން ރަށުގައި ފިރިމީހާހެ ފަރާތުން ގެވެށި އަނިޔާއާއެވެ.
ފިރިމީހާގެ ރަށުގައި ޖީނާއަށް ކުރިމަތިވި އަނިޔާއަށް ކެތްނުވެ، ޖީނާ އޭނާގެ އުފަން ރަށަށް ބަދަލުވިއެވެ. އެއިރު އޭނާގެ އެއް ކުއްޖަކު ހުރެއެވެ. އަދި އަނެއް ކުއްޖާއަށް ބަނޑުބޮޑެވެ. ރަށަށް ބަދަލުވެ، މައިފުށުގެ ވީރާނާވެ ބޮލަށް ވެއްޓެން ކައިރިވެފައިވާ ގިފުޑިގަނޑެއްގައި ޖީނާ އޭނާގެ ހަޔާތުގެ ދުވަސްތައް ގުނަމުންދިޔައީ، އެ ހާލަތުން އަރައިގަނެވޭނެ ދުވަހެއްގެ އުންމީދުގައެވެ. އެ އުންމީދުގައި، ޖީނާ ހުއްޓައި، ޖީނާގެ އާއިލާގެ އަތުގައި ހިފީ "މަމްސް އެއިޑް" އިންނެވެ.
މަމްސް އެއިޑްގެ "ހިޔާވެހި" ކެމްޕެއިނުގެ ދަށުން ޖީނާގެ އާއިލާއަށް ބޯހިޔާވަހިކަން ފޯރުކޮށްދޭން ނިންމައި އެކަމުގެ އަމަލީ މަސައްކަތް އެ ޖަމިއްޔާއިން ފެށީ ބޮޑެތި ގޮންޖެހުންތަކާވެސް އެކުގައެވެ. ޖީނާގެ ނަމަށް އެ ރަށު ގޯއްޗެއް ރަޖިސްޓަރީކޮށްދީ އެ ގޯތީގައި ތިން ކޮޓަރީގެ ގެއެއް އެޅުމުގެ މަސައްކަތް އެ ރަށުގެ ކޮންސްޓްރަކްޝަން ކުންފުންޏަކާ ހަވާލުކޮށްގެން "މަމްސް" އިން ފެށީ މިދިޔަ އަހަރުގެ ޖުލައި މަހުގެ ތެރޭގައެވެ.
އަހަރަކަށްވުރެ ކުރު މުއްދަތެއްގައި އެ ގޭގެ މަސައްކަތް އެއްކޮށް ނިންމައި، މި މަހު ޖީނާއަށް ގެ ހަވާލުކުރީ އެންމެ ޒަމާނީ ފެންވަރަށް އެތަން ހަދައި ނިންމައިފަ އެވެ. ތިން ކޮޓަރީގެ އެ ގޭގެ ސިޓިން ރޫމުގައި ތަށިމުށި ޖަހައި، ސޯފާ ބަހައްޓާފައި ހުރިއިރު ހަމަޖެހިލައިގެން ޓީވީ ބަލައިލެވޭނެ އިންތިޒާމު ހުރީ ހަމަޖައްސައިފަ އެވެ. އެތަން ޒީނަތްތެރިކުރަން ތިރީގައި ކާޕެޓް އަޅައި މާގަސްތައް ވެސް ހުރީ ބައްޓާފައި ހުއްޓެވެ.
ޖީނާގެ ދެ ދަރީންނަށް ވަކީން ކޮޓަރިއެއް ހުންނައިރު، ޖީނާއަށްވެސް ކޮޓަރިއެއް ހާއްސަކޮށްފައި ހުއްޓެވެ،
"ބުނާނެ އެއްޗެއް ވެސް ނޭނގެ، ހުރިހާ ފަރާތްތަކަށް ޝުކުރުވެރިވަން. ޖީނާއަށް އަމިއްލަ ވަޒަނެއް ދިނީތީ. މިއަށް ވުރެ އިތުރު ރައްކާތެރި އިތުރު ތަނެއް ދެން ހިޔެއް ނުވޭ ލިބޭނެހެން. އެތައް ވޭނެއް ތަހައްމަލުކޮށްފައި އެކުދިންނަށް ވެސް ރައްކާތެރި މާހައުލަކަށް އާދެވުމުން ވަރަށް އުފާވޭ.ހީވަނީ ގަނޑުވަރެއް ހެން. މިއީ ޖީނާއަށް ގަނޑުވަރެއް،" ކަރުނުން ލޯ ފޮހެލަމުން ޖީނާ ބުންޏެވެ.
މަމްސް އެއިޑްގެ ސްޕޮންސަރުންގެ އެހީގައި، ޖީނާގެ އެ ގެއަށް ބޭނުންވާ ހުރިހާ ސާމާނަކާއި އެމީހުންގެ އަންނައުނާއި ހަ މަހުގެ ކާބޯތަކެތި ވެސް ވަނީ ފޯރުކޮށްދީފަ އެވެ. ޖީނާއަށް އެ ގެ އެޅުމަށް މިލިއަނެއްހާ ރުފިޔާ ހަރަދުވެފައިވެއެވެ.