ރާއްޖޭގެ މާކެޓަށް ޑިމާންޑު ބޮޑު ބަންގުލަދޭޝްގެ ލޭބަރުން ގެނައުން މަނާކޮއްފައި އޮންނަތާ 4 އަހަރު ވެއްޖެއެވެ. ނިމިދިޔަ ސަރުކާރުން ކޮންމެ ގައުމަކަށްވެސް ވަނީ 150،000 ކޯޓާ ކަނޑައަޅާފައެވެ. އެގޮތުން ބަންގްލަދޭޝް އަށް ކަނޑައަޅާފައިވާ ކޯޓާ 2019 ވަނަ އަހަރު ހަމަވެފައިވާތީ އެ ގައުމުން އިތުރަށް ލޭބަރުން ގެނައުން ވަނީ މަނާކޮށްފައެވެ. އެހެން ނަމަވެސް އެ ގައުމުން ޑޮކްޓަރުންނާއި ނަރުހުން ފަދަ ޓެކްނިކަލް އަދި ޕްރޮފެޝަނަލް މަސައްކަތް ކުރާ މީހުން ގެނައުމަށް އެއްވެސް ހުރަހެއް ނެތެވެ. 

ރާއްޖޭގައި އެންމެ އާދައިގެ ދަނޑުވެރިކަންކުރާ މީހާއިން ފެށިގެން ބޮޑެތި ވިޔަފާރިތަކުގައި މަސައްކަތް ކުރުމަށްވެސް އެންމެ ޑިމާންޑު ބޮޑީ ބަންގުލަދޭޝްގެ ލޭބަރުންނެވެ. އެއީ ސަބަބުތަކެއް ނެތިއެއްވެސް ނޫނެވެ. ބަންގުލަދޭޝްގެ ގިނަ ލޭބަރުންނަކީ އަވައްޓެރި އެހެން ގައުމުތަކުގެ ލޭބަރުންނާއި އަޅާ ބަލާއިރު މަސައްކަތަށް ފަރުވާތެރި، މެނޭޖުކުރަން ފަސޭހަ ބައެއްކަމުން އެ މީހުންނަށް ވަނީ ދިވެހީންގެ އިތުބާރު ލިބިފައެވެ.

ބަންގުލަދޭޝް އިން ލޭބަރުން ގެނައުން މަނާކުރުމާ ގުޅިގެން އިންޑިއާ، ސްރީލަންކާ، އަދި ނޭޕާލް ފަދަ އަވައްޓެރި ގައުމުތަކުން ލޭބަރުން ގެނަސްގެން މަސައްކަތްތަށް ކުރުމަށް މަސައްކަތް ކުރި ކަމުގައި ދިވެހި ދަނޑުވެރިންނާއި ވިޔަފާރިވެރިން ބުނެއެވެ. ނަމަވެސް، މަސައްކަތަށް ފަރުވާކުޑަކޮށް މައްސަލަ ޖެއްސުން އިންތިހާއަށް ބޮޑުވެ ގިނަ ދުވަހެއްނުވެ އެމީހުން ގައުމަށް ފޮނުވާލަންޖެހޭކަމަށާއި މިކަމުގެ ސަބަބުން މަސައަކަތްތަށް ނުނިންމި ދިގުދެމިގެންދެއެވެ. އަދި ކޮންމެ ލޭބަރަކު ގެނައުމަށް ޓިކެޓާއި އެކު 10،000 ރުފިޔާ އާއި ގާތްކުރާ އަދަދަކަށް ޙަރަދުކުރަންޖެހޭއިރު، ގިނަ ދުވަހެއް ނުވެ ފޮނުވާލަން ޖެހުންވަނީ ވަރަށްވެސް ބޮޑު މާލީ ބުރައަކަށެވެ. މިފަދަ ބޮޑު ޙަރަދެއް ތަކުރާރުކޮށް ކުރަންޖެހުން ވެގެންދަނީ ގިނަ ކުދި ވިޔަފާރީތަށް ބަނގުރޫޓުވާން މެދުވެރިވާ މައިގަނޑު އެއްސަބަބަށެވެ. 

ފަރުވާތެރިކަމާއި އެކު މަސައްކަތްކުރާ އިތުބާރުހިފޭ ލޭބަރުން ލިބުން ދަތިވުމުގެ އާޙިރު ނަތީޖާ އަކަށް ވަނީ މުޅި ރާއްޖޭގެ އިގްތިސާދަށްވެސް ނުރަނގަޅު އަސަރުކުރުމެވެ. އެހެނީ، ގައުމެއްގެ އިގްތިސާދު ކުރިއަރައިދާނީ އެގައުމެއްގެ ކުދި އަދި މެދުފަންތީގެ ވިޔަފާރީތަށް ކުރިއަރައިގޮސްގެންނެވެ. 

އެހެންކަމުން ރާއްޖޭގެ އިގްތިސާދު މިއަދު ވެއްޓިފައިމިވާ އަނދަވަޅުން އަރައިގަތުމަށްޓަކައި، ބަންގްލަދޭޝްގެ ލޭބަރުން ގެނައުން މަނާކޮށްފައި އޮތް އޮތުން އުވާލައި ގަވައިދުގެ ތެރެއިން އެމީހުން ރާއްޖެ ގެނެވޭނެ ގޮތް ހެދުމަކީ ވަރަށް މުހިންމުކަމެކެވެ. އަދި މިއާއި އެކު ގަވާއިދާއި ހިލާފަށް އުޅޭ ބިދޭސީންނާއި އެމީހުން ގެންގުޅޭ ދިވެހީންނަށް މިކަން ތަކުރާރުކުރަން ނުކެރޭނެފަދަ ފިޔަވަޅު އަޅުމަކީވެސް ވީ އެންމެ އަވަހަކަށް ކުރަންޖެހޭ ކަމެކެވެ.