ހއ. އުތީމު

މި ރަށަކީ ރާއްޖޭގެ ތާރީހާ ގުޅިފައިވާ މުހިންމު ރަށެކެވެ. ޕޯޗުގީޒުންގެ އަނިޔާވެރި ވަކިތަކުން ރާއްޖެ ސަލާމަތްކުރުމުގެ މަތިވެރި ޖިހާދުގައި އިސްކޮށް ހަރަކާތްތެރިވި މުހައްމަދު ތަކުރުފާނު (ބޮޑުތަކުރުފާނު)ގެ އުފަން ރަށަކީ މިއީއެވެ. ބޮޑުތަކުރުފާނާއެކު އެ ޖިހާދުގައި ދެން ބައިވެރިވެވަޑައިގެންނެވި ހަސަން ތަކުރުފާނާއި އަލީ ތަކުރުފާނުގެވެސް އުފަން ވަޒަނެވެ. ތުއްޕުޅުއިރުގެ ހަނދާންތައް ގުޅިފައިވާ ރަށެކެވެ. ބާރަށް ދާއިރާގައި އޮންނަ މި ރަށަކީ ސާފު ރަށެކެވެ. މީސްކޮޅު ގިނައެއް ނޫނެވެ. ރަށުގައި އުޅެނީ 566 އެއްހާ މީހުންނެވެ. 

މި ރަށަކީ، ހިތްހެޔޮ ބައެއް އުޅޭ ރަށެކެވެ. ސިޔާސީ ފިކުރު ތަފާތަސް އެކުގައި އުޅެން އެނގޭ ރައްޔިތެއް ދިރިއުޅޭ ރަށެކެވެ. ރިޔާސީ އިންތިހާބުގެ ކެމްޕެއިނަށް ރައީސް އިބްރާހިމް މުހައްމަދު ސޯލިހު ރާއްޖޭގެ ރަށްރަށަށް ކުރައްވަމުންގެންދަވާ ދަތުރުފުޅުގައި އެ މަނިކުފާނަށް ޖެއްސުން ކުރުމުގެ އަމަލުތައް ނުފެނުނު ހަމަ އެކަނި ރަށަކީވެސް މިއެވެ. އިދިކޮޅު ޕީޕީއެމަށް މި ރަށުގެ މެޖޯރިޓީ މީހުން ތާއީދުކުރި ނަމަވެސް އަދި ޕީޕީއެމްގެ ސައްތައިން ސައްތަ އަގުލަބިއްޔަތު އޮންނަ ކައުންސިލަކާއި އަންހެނުންގެ ތަރައްގީއަށް މަސައްކަތްކުރާ ކޮމިޓީއެއް އޮތް ނަމަވެސް މިދިޔަ މަހު ރައީސް މި ރަށަށް ކުރެއްވި ޒިޔާރަތުގައި މި ރަށުން އެ މަނިކުފާނަށް ދައްކުވައިދިނީ ސިޔާސީ ފިކުރު ތަފާތަސް، އެއިރެއްގެ ވެރިއަކަށް އޮންނަ ލޯތްބާއި އިހްތިރާމެވެ.

ރަށުގެ ބަނދަރު ސަރަހައްދުން ސިޔާސީ ޕާޓީއެއްގެ އެއްވެސް ދިދައެއް ނުފެނެއެވެ. ސިޔާސީ ލަވައެއް ނުޖަހައެވެ. ބެނާތަކެއް ނެތެވެ. ހަމައެކަނި ފެންނާން ހުރީ ގައުމީ ދިދަތައް އެކަންޏެވެ. މަގުތަކުގައި ކޮންމެވެސް ވަރަށް އެކިއެކި ސިޔާސީ ޕާޓީތަކުގެ ދިދަތަކާއި ގައުމީ ދިދަ ދަމާފައި ހުއްޓެވެ.  

"..، އަޅުގަނޑުމެން އޮންނާނެ ކައުންސިލުން އުސޫލެއް ހަދާފައި ބަނދަރު ސަރަހައްދުގައި އެއްވެސް ސިޔާސީ ހަރަކާތެއް ނުހިންގުމަށް. އަދި އެއްވެސް ސިޔާސީ ބެނާއެއް އަދި ދިދައެއްވެސް ބަނދަރު ސަރަހައްދުގައި ނުޖެހޭނެ. ދެން ކައުންސިލްގެ އޮންނާނެ ނިންމުމެއް. ކައުންސިލްގެ މުދާ އެއްވެސް ސިޔާސީ ކަމަކަށް ދޫނުކުރަން. އެއީ އެއްކޮޅުވިޔަސް އިދިކޮޅުވިޔަސް" މި ރަށު ކައުންސިލްގެ ރައީސް އަބްދުﷲ ރަޝީދު ވިދާޅުވިއެވެ.

އާއްމު ގޮތެއްގައި ރައީސް ކެމްޕެއިނަށް ރަށްރަށަށް ވަޑައިގަންނަވާއިރު، ސަރުކާރަށް ތާއީދުނުކުރާ މީހުންގެ އުނދަގުލުން ސަލާމަތްވުމަށް ބައެއް ސަރަހައްދުތައް ފުލުހުން ލައްވައި ބަންދުކުރަން ޖެހެއެވެ. އެ ރަށްރަށުގައި ރައީސަށް ތާއީދު ނުކުރާ މީހުން ލައުޑް ސްޕީކަރުން ލަވަތައް ޖަހައި ރައީސަށް ފުރައްސާރަކޮށްވެސް ހަދައެވެ. ނަމަވެސް މި ރަށުން އެފަދަ އެއްވެސް މަންޒަރެއް ނުފެނެއެވެ. ކޮންމެ މީހަކުވެސް ވާހަކަ ދައްކަނީ ހިތްހެޔޮކަމާއެކުގައެވެ. މުޅި ރަށުން ފެންނަނީ އަމާންކަމެވެ. ހިނިތުންވުމެވެ.  

"މި ރަށަކީ އަބަދުވެސް ސިޔާސީ ކަންކަމުގައި އެއްބަޔަކު އަނެއް ބަޔަކަށް އިހްތިރާމުކުރާ ރަށެއް. ޖެއްސުން ކުރުމުގެ ކަންކަމާއި އުނދަގޫކުރުމުގެ ކަންކަން ނުފެންނާނެ މި ރަށުން. އެކަމަކު، އެ ޕާޓީއަކުން ކުރަން ބޭނުން ކަމެއް މިނިވަންކަމާއެކު ކުރެވޭނެ މި ރަށުގައި" މި ރަށުގެ ޒުވާނަކު ބުންޏެވެ. 

މި ރަށަށް ރައީސް ކުރެއްވި ދަތުރުފުޅުގައި މި ރަށު ގަޑުވަރު ކައިރީގައި ހުންނަ "ބޮޑުތަކުރުފާނު ހަނދާނީ މަރުކަޒު"ގައި ބޭއްވި ކެމްޕެއިން ޖަލްސާ ފައްޓަވަމުންވެސް ރައީސް ވަނީ މި ރަށަށް ވަޑައިގެންނެވުމުން ކުރެވެނީ ގައުމީ އިހްސާސެއްކަމަށާއި އާވެގެންދަނީ ގައުމީ ހަނދާންތަކެއް ކަމަށް ވިދާޅުވެފައެވެ. 

ރައީސްގެ ވާހަކަފުޅުގެ ކުރީކޮޅު ހުސްކުރެއްވީ، މި ރަށަށް ތައުރީފުކުރެއްވުމަށެވެ. އެގޮތުން މި ރަށަކީ ސުލްހަވެރިކަމާއި އަމާންކަން އިސްކޮށް ހަމަޖެހުމަށް ލޯބިކުރާ އަދި އެކީގައި އުޅޭ ރައްޔިތެއް ދިރިއުޅޭ ރަށެއްކަމުގައި އެ މަނިކުފާނު ވިދާޅުވެފައިވެއެވެ.

"އަޅުގަނޑު އެންމެ ފަހުން މި ރަށަށް އައި ދަތުރުގައިވެސް އުތީމުގެ ކައުންސިލާއެކުގައިވެސް ބައްދަލުކުރުމުގެ ފުރުސަތު އަޅުގަނޑަށް ލިބިގެންދިޔަ. މުޅި ކައުންސިލަކީވެސް ޕީޕީއެމް ކައުންސިލެއް. އެހެންނަމަވެސް ކައުންސިލްގެ ހުރިހާ މެންބަރުން އަޅުގަނޑަށް ޔަގީންކަން އެރުވީ، ރަށުގެ ތަރައްގީއަށްޓަކައި ރައްޔިތުންގެ ކުރިއެރުމަށް ކުރާ ކޮންމެ ކަމެއްގައި އެ ބޭފުޅުންގެ ތާއީދު ސަރުކާރަށް ލިބިގެންދާނެއޭ. އަޅުގަނޑު މިއަދު އެ ބޭފުޅުންނަށް ދަންނަވާލަން ބޭނުންވަނީ މިއޮތީ ވަގުތު އައިސް ޖެހިފައޭ" ރައީސް ވިދާޅުވެފައިވެއެވެ.  

އިދިކޮޅު ޕީޕީއެމް-ޕީއެންސީ ހިމެނޭ ޕްރޮގްރެސިވް ކޮންގްރެސް ކޯލިޝަންގެ ރިޔާސީ ކެންޑިޑޭޓް ޑރ. މުހައްމަދު މުއިއްޒު މި ރަށަށް ވަޑައިގަތުމުންވެސް ފެނުނީ ހަމަ އެއް މަންޒަރެކެވެ. އެ ކޯލިޝަންގެ ފުރިހަމަ ތާއީދު އޮތް ނަމަވެސް ސިޔާސީ ލަވަތައް ޖަހައިި ކެމްޕެއިންގެ ދިދަފަތިތަކާއި ބެނާތައް ރަށުގެ މަލަމަތީގައި ނުދަމައެވެ. 

އުތީމުން ފެނުނު ރީތި ނަމޫނާގެ ހުރިހާ ޝުކުރެއް ހައްގުވަނީ އެ ރަށުގައި ދިރިއުޅޭ ރައްޔިތުންނަށެވެ. ފިކުރު ތަފާތަސް ގައުމީ ޖޯށާއި ހަމަޖެހުން އެ ރައްޔިތުން އަބަދުމެ އިސްކުރެއެވެ. ރަށަށް ލިބެން އޮތް ތަރައްގީއެއް ހޯދަށް އެންމެން އެކަތިގަނޑަކަށްވެއެވެ. އުތީމުގެ އަދުގެ ޖީލުންވެސް ފެންނަނީ މީގެ އެތައް ސަތޭކަ އަހަރެއް ކުރިން މި ރަށުގެ އަދި ރާއްޖޭގެ ފަހުރުކަމަށްވާ، ބޮޑުތަކުރުފާނު ދެއްކެވި މަތިވެރި މިސާލެވެ.